05 август 2018
2 374
4
მომწონს 11

განსაკუთრებით ლამაზი არტის მქონე ანიმეები

   ამ სტატიაში მინდა თავი მოვუყარო რამოდენიმე ისეთ ანიმეს, რომელიც თავისი ვიზუალური ესთეტიკით განსაკუთრებული, გამორჩეული და დასამახსოვრებელია. 'არტი', ვიზუალური ეფექტები, (ანიმაცია) - ძირითადად ის მთავარი კრიტერიუმებია რითიც ქვევით მოყვანილი ანიმეები შეირჩა. შევეცადე აქ მოყვანილი ანიმეები ჟანრობრივად მრაფალფეროვანი ყოფილიყო  და არ ყოფილიყო მხოლოდ კონკრეტული მიმართულებით (მაგ.: რომანტიკის და სასკოლო). ცხადია ჩამონათვალი სრული არ არის. 

             
Kotonoha no Niwa 
"სიტყვების ბაღი"- ერთ-ერთი ყველაზე შთამბეჭდავი ანიმეა თავისი ვიზუალური ეფექტებით და არტით. 46 წუთიანი ფილმი 2013 წელს  გამოვიდა და  სტუდია CoMix Wave Films -ის მიერ არის შექმნილი. ანიმე მაკოტო შინკაის ნამუშევარია, ადამიანის რომლის ანიმეებიც  კარგად არის ცნობილი და დასამახსოვრებელია თავისი ხელწერით. თავად ანიმე 15 წლის სტუდენტ ტაკაო აკიზუკისა და მომხიბვლელ 27 წლის იუკარი იუკინოს დაახლოების ამბავს გადმოსცემს, რომელიც წვიმიან სეზონზე ტოკიოს პარკში, "შინჯუკუ გიოენ"-ში ვითარდება. ანიმე ცხოვრებისეულის, რომანტიკის, დრამისა და ფსიქოლოგიურის ჟანრებს აერთიანებს და 13 წლის და ზევით ასაკის მაყურებლებზეა გათვლილი, თუმცა თავისი ესთეტიკით გულგრილს არც ერთი ასაკის მაყურებელს არ ტოვებს.
                                                                      
Kimi no Na wa
"შენი სახელი" - ისევ მაკოტო შინკაი და სტუდია CoMix Wave Films. თითქმის 2 საათიანი ფილმი, რომელიც 2016 წელს გამოვიდა, ძირითადად იმავე ასაკის მაყურებელზეა გათვლილი და რომანტიკის, დრამის, სკოლისა და ზებუნებრივის ჟანრებს აერთიანებს. ანიმე უმაღლესი სკოლის მოსწავლე გოგონას მიცუჰა მიამიზუს და ტაკი ტაჩიბანას ცხოვრებაზეა,  რომლებიც თავიანთი ცხოვრებით ცხოვრობენ სანამ ერთ დღესაც ერთმანეთის სხეულებში არ გამოიღვიძებენ.  "შენი სახელი" მაკოტოს შემოქმედებაში ერთ-ერთი ყველაზე დასამახსოვრებელი, მაღალრეიტინგული და მსოფლიოს მაშტაბით ყველაზე გაყიდვადი ანიმეა.
                                                             
Akagami no Shirayuki-hime

"წითელთმიანი ფიფქია" - 12 ეპიზოდიანი სერიალი სტუდია Bones-მა 2015 წელს გამოუშვა. ანიმე მოგვითხრობს  წითელთმიან გოგონაზე სახელად შირაიუკიზე, რომელიც ქვეყანა ტანბარუნში ცხოვრობს და მცენარეულ მედიკამენტებს ამზადებს და ყიდის, თუმცა მისი ცხოვრება მაშინვე იცვლება, როგორც კი ტანბარუნის პრინცი რაჯი შენიშნავს, მისი უჩვეულო ფერის თმებით მოიხიბლება და ხარჭობას შესთავაზებს. ამის შემდეგ იწყება წითელთმიანი გოგონას თავგადასავალი. 13 წლის ასაკის მაყურებელზე გათვლილი ფანტაზიის, რომანტიკის, შოჯოს და  დრამის ჟანრის ანიმე სიუჟეტურად შესაძლოა ბანალურიც იყოს, თუმცა ამ ანიმეს ვიზუალური მხარე საკმაოდ შთამბეჭდავი აქვს.

                                                    
Mushishi

"მუშიში", რეჟისორ ჰიროში ნაგაჰამას და სტუდია Artland-ის 26 ეპიზოდიანი ანიმე, მისტიკის, ისტორიულის, სათავგადასავლოსა და ფანტაზიის ჟანრებს აერთიანებს. ანიმე 2005 წელს გამოვიდა (შემდგომში გაგრძელებებიც მოჰყვა). ანიმეში მთავარი გმირი გინკო სხვადასხვა ადგილებში მოგზაურობს და იცავს ადამიანებს ზებუნებრივი არსებებისგან, რომლებსაც მუში ეწოდება, სხვადასხვა ფორმის არიან და ადამიანებს აავადებენ. ჩვეულებრივ მუში ადამიანებისთვის შეუმჩნეველია თუმცა გინკოს შეუძლია მათი დანახვა და ის მუშის ოსტატი ხდება. არაჩვეულებრივი პეიზაჟების, ფერების და საერთოდ მიმზიდველი არტის მქონე ანიმე თავისთავდ ჩამონათვალში მოხვდა.

                                                    
Kumo no Mukou, Yakusoku no Basho
"ღრუბლებს მიღმა, აღთქმული ადგილი" - 1 საათი და 30 წუთიანი მაკოტოს მორიგი ანიმე ფილმი სამხედროს, რომანტიკა/დრამისა და სამეცნიერო ფანტასტიკის ჟანრის ანიმეა... არაჩვეულებრივი ანიმაცია, სცენები და სინათლის ეფექტები, რაც დასამახსოვრებელს ხდის შინკაის ნამუშევარს არც ამ კონკრეტულ ანიმეს აკლია. ანიმეში გადმოცემული სამი მეგობრის ამბავი, რომლებიც აომორიში ცხოვრობენ, ორი ბიჭი - ჰიროკი ფუჯისავა და ტაკუია შირაკავა და ერთი გოგო სახელად საიური სავატარი. ერთ დღესაც საიური უცნაურ ვითარებაში გაუჩინარდება, რაც მეგობრებისთვის დიდი ტრამვა იქნება, ეს ფაქტი მათ მეგობრობაზეც იქონიებს გავლენას და საბოლოოდ ისინი თავ-თავინთი გზით განაგრძობენ ცხოვრებას, თუმცა მათი გზები კვლავ გადაიკვეთება და აღმოაჩენენ, რომ მათი გაუჩინარებული მეგობარი სამყაროს ხსნის გაზაღები შეიძლება იყოს. ანიმე 2004 წელს გამოვიდა და ძირითადა გათვლილია 13-დან ზევით სასაკის მაყურებელზე, თუმცა როგორც ყოველთვის, მაკოტოს ნამუშევრები ნებისმიერი ასაკის მაყურებლისთვის სასიამოვნოდ სანახავია სწორედ ამ არტის და  გრაფიკის წყალობით.


                                                                      


Shigatsu wa Kimi no Uso

"შენი აპრილის სიცრუე" - ანიმე რომლის ხსენებაზეც შესაძლოა პირველად არაჩვეულებრივი მუსიკალური გაფორმება გაგვახსენდეს, თუმცა ამ ანიმეს ვიზუალური მხარეც არანაკლებ მიმზიდველი აქვს. ერთ-ერთი მაღალრეიტინგული ანიმე, დრამის, მუსიკის, სკოლისა და ცხოვრებისეულის ჟანრებს აერთიანებს და როგორც ამ ჟანრების ანიმეების უმეტესობა, ძირითადად შესაბამისი ასაკის მაყურებელზეა გათვლილი. სერიალი 22 ეპიზოდისგან შედგება და შექმნილია სტუდია A-1 Pictures მიერ, ანიმეს გამოსვლა 2014 წელს დაიწყო. ანიმე გენიოს პიანისტ კოსეი არიმაზეა,  კოსეის 11 წლის ასაკში დედამისი, რომელიც მისი მენტორიც იყო, გარდაეცვლება და ამ ტრამვის გამო ვეღარ შეძლებს კონცერტზე გასვლას. ამ ამბიდან 2 წლის განმავლობაში ის ინსტრუმენტს ვეღარ გაეკარება, სანამ ერთ დღესაც მის ცხოვრებაში ლამაზი მევიოლინე გოგონა სახელად კაორი არ გამოჩნდება.

                           
Fate/Zero ~ Fate/Stay Night

"ბედისწერა/დასაწყისი ~ ბედისწერა/ბრძოლის ღამე" - ერთ-ერთი მაღალრეიტინგული ანიმეს პირველი ნაწილი მთლიანობაში 25 ეპიზოდიანი 2011 წელს გამოსული ანიმე სერიალია და ძირითადად გათვლილია უფროსი ასაკის მაყურებელზე. ანიმე საკმაოდ მაღალ ხარისხშია გაკეთებული. გრაფიკა და არტი ამ ანიმეს ერთ-ერთი ძლიერი მხარეა და მთლიანობაში კარგი სანახავია.  არტის და ეფექტების მხრივ ამ ანიმეს მეორე ნაწილიც არ ჩამორჩება. მძაფრსიუჟეტიანი, ფანტაზიის და მაგიის ჟანრის ანიმეს პირველი ნაწილი სტუდია Ufotable ეკუთვნის და ორი სეზონისგან შედგება. ანიმე მაგებზეა, რომლებიც გმირების სულებს იძახებენ "წმინდა გრაალის ომში" მონაწილეობის მისაღებად. მაგები რომლებიც გამოძახებული გმირების ბატონები ხდებია თავის მსახურებთან ერთად სამკვდრო-სასიცოცხლოდ იბრძვიან გრაალის მოსაპოვებლად, რომელიც თავის მფლობელს ნებისმიერ სურვილს უსრულებს. Studio Deen-ის მიერ გაკეთებული  24 ეპიზოდიანი მეორე ნაწილი სიუჟეტურად შედარებით მოიკოჭლებს, სხვა საქმეა მეორე ნაწილის ალტერნატიული 12 ეპიზოდიანი ვერსია, რომელიც კვლავ სტუდია Ufotable ეკუთვნის, თუმცა ვიზუალირი მხარე ნებისმიერ შემთხვევაში "Fate"-ის სერიებში  მოწოდების სიმაღლეზეა.

                                                    
Ookami Kodomo no Ame to Yuki

"მგლის ბავშვები" - მიუხედავად იმისა, რომ ეს ანიმე 2012 წელს გამოვიდა, თავისი ესთეტიკით ძველი დროის ანიმეებს უფრო მოგვაგონებს და სწორედ ასეთი ვიზუალური მხარე მატებს ნამუშევარს თავისებურ ხიბლს, რომელიც Studio Chizu შექმნა. "მგლის ბავშვები" ცხოვრებისეულის და ფანტაზიის ჟანრის ანიმე ფილმია, რომელიც თითქმის 2 საათამდე გრძელდება. ანიმე კოლეჯის სტუდენტ ჰანაზეა, რომელსაც მაქცია შეუყვარდება და მასთან  ერთად ოჯახს შექმნის, თუმცა ქმრის სიკვდილის შემდეგ ის მარტოხელა დედა ხდება და თანამედროვე სამყაროში ორი ნახევრად მაქცია შვილების აღზრდასთან დაკავშირებულ სირთულეებთან მოუწევს გამკლავება. ანიმე საკმაოდ მაღალრეიტინგულია და არა ერთი ჯილდო აქვს აღებული.

                                                   
Nagi No Asukara

"დედამიწის მშვიდი ფერი" - ამ ანიმეში მოვლენები ძირითადად წყალწვეშ ვითარდება, შესაბამისად მთლიანად ანიმეს ვიზუალური მხარეც საკმაოდ უჩვეულოა, ეფექტური და საკმაოდ მაღალ ხარისხშია გაკეთებული სტუდია P.A. Works-ის მიერ. ანიმე 26 ეპიზოდისგან შედგება და მისი გამოსვლა 2013 წელს დაიწყო. დრამის, ფანტაზიის და რომანტიკის ჟანრის ანიმე ჩვეულებისამებრ 13-14 დან ზევით ასაკის მაყურებლისთვისაა განკუთვნილი. ანიმე 14 წლის ოთხ მეგობარზეა, რომლებიც წყალქვეშ არსებულ სოფელში ცხოვრობენ (თუ როგორ ამას ანიმეში გაიგებთ) და იმისათვის, რომ სკოლაში იარონ, იძულებული არიან ოკეანე დატოვონ და მიწის ზედაპირზე ამოვიდნენ, რის შემდეგაც მეგობრებს ადაპტაციის გავლა და სირთულეების დაძლევა უწევთ.

                                                   
Violet Evergarden

"ვაიოლეთ ევერგარდენი" - არის ანიმე რომელიც დრამატული სიუჟეტის გარდა ასევე შთამბეჭდავია ანიმაციით,  ანიმე 2018 წელს გამოვიდა და მაშინვე გახდა ერთ-ერთი რეიტინგული ანიმე.  დრამის, ცხოვრებისეულისა და ფანტაზიის ჟანრის ანიმე "ვაიოლეთ ევერგარდენი" 13 ეპიზოდიანი სერიალია და შექმილია სტუდია Kyoto Animation მიერ. ანიმე მთავარ გმირ, ვაიოლეთ ევერგარდენზეა, რომელიც ომის შემდეგ საზოგადოებას უბრუნდება და რადგან უკვე ჯარისკაცი აღარ არის ცდილობს საზოგადოებაში ინტეგრირდეს და ჩაწვდეს საკუთარი ცხოვრების არსს. სწორედ ამ მიზნით ის "CH ფოსტის" კომპანიაში   "ავტომახსოვრობის თოჯინა"  გახდება და თანდათან ახალ ცხოვრებას იწყებს. არაჩვეულებრივი ანიმაცია, ბუნების პეიზაჟები, წყლის და სინათლის ეფექტები და მომენტები არის მოკლედ ის ყველაფერი, რაც ამ ანიმეს ახასიათებ და ვისთვისაც ანიმეში ვიზუალურ მხარესაც არანაკლები მნიშვნელობა აქვს, ეს მართლაც სანახავი უახლესი ანიმეა (თუნდაც მხოლოდ ამ კუთხით).

                                               


Byousoku 5 Centimeter

"5 სანტიმეტრი წამში" - სტუდია CoMix Wave Films და მაკოტო შინკაის 3 ეპიზოდიანი მორიგი ნამუშევარია. ანიმე 2007 წელს გამოვიდა და ესეც 13 წლიდან ზევით ასაკის მაყურებელზეა გათვლილი. ანიმე ტაკაკი ტოონოს და აკარი შინოჰარას მეგობრობაზეა, რომლებიც ერთმანეთს დაშორდებიან, მაგრამ მათ შორის გაჩენილი დისტანციის მიუხედავად ცდილობენ ურთიერთობა მაინც შეინარჩუნონ. რომანტიკის, დრამის და ცხოვრებისეული ჟანრის ანიმე ერთ-ერთი გამორჩეულია და შთამბეჭდავი არტის მქონე ანიმეების ჩამონათვალში მაკოტო შინკაის სხვა ნამუშევრებთან ერთად თავისთავად ხვდება.


                                                                                                                                          

Sword Art Online

"ხმლის ხელოვნება" - შემოკლებით "SAO" სტუდია A-1 Pictures  25 ეპიზოდიანი ანიმეა.  ანიმე 2012 წელს გამოვიდა (მომდევნო წლებში გაგრძელებები მოჰყვა) და თამაშის, რომანტიკის, სათავგადასავლოსა და ფანტაზიის ჟანრებს აერთიანებს. "SAO"-ში მოქმედება  2022 წელს ხდება, მთავარი გმირები კაზუო კირიგაია ზედმეტსახელად "კირიტო" და ასუნა იუკი ონლაინ თამაშების მონაწილეები არიან, რომლებსაც თამაშის შემქმნელი ვირტუალურ სამყაროში ჩატოვებს. იმისათვის რომ თამაშს თავი დააღწიონ და რეალურ ცხოვრებას დაუბრუნდნენ მოთამაშეებმა თამაშის ასივე დონე უნდა დახურონ. ანიმე  მთელი თავისი პეიზაჟებით, ეფექტებით და შექმნილი გარემოთი საკმაოდ გამორჩეული და დასამახსოვრებელია.
                                                                                   

Kyoukai no Kanata

"ჰორიზონტს მიღმა" - არის სტუდია Kyoto Animation მიერ გამოშვებული 12 ეპიზოდიანი 2013 წლის ანიმე. როგორც წესი ამ სტუდიის მიერ შექმნილი ანიმეები საკმაოდ მაღალი ხარისხის გრაფიკითა და ლამაზი ვიზუალური მხარით გამოირჩევა და არც ეს უკანასკნელია გამონაკლისი.  ზებუნებრივის და ცხოვრებისეულის ჟანრის ანიმე კვლავაც კონკრეტული ასაკის მაყურებლისთვისაა შექმნილი, ამ შემთხვევაშიც 13-14-დან ზევით. ანიმე ბოროტ არსებებზე მონადირეებზეა, რომლებიც კლანებში ერთიანდებიან და  უნიკალურ საბრძოლო უნარებს ფლობენ. ერთ-ერთი ასეთი მონადირეა მთავარი გმირი მირაი კურიამა, რომელსაც აქვს უნარი თავისი სისხლი იარაღად გარდაქმნას. ის თავის მეგობრებთან ერთად  სწორედ ამ არსებებზე ნადირობს - უომუებზე, რომლებიც ადამიანების უარყოფითი ემოციების გამოვლინებებია.

                                                                      


Mononoke Hime

"პრინცესა მონონოკე" - 1997 წლის ანიმე ფილმი, რომელიც ნახვისთანავე შთაბეჭდილებას ტოვეს თავისი დამახსიათებელი ესთეტიკით და არამარტო ვიზუალური მხარით, Studio Ghibli-ს და ჰაიაო მიაძაკის ნამუშევარია. ანიმეს არაერთი ჯილდო აქვს აღებული. სათავგადასავლოსა და ფანტაზიის ჟანრის ანიმე რომელიც 2 საათზე მეტ ხანს გრძელდება ადამიანისა და ბუნების დაპირისპირებაზეა. ერთ-ერთი მთავარი გმირი არის ახალგაზრდა პრინცი აშიტაკა, რომლის სოფელსაც დემონი დაესხმება თავს. პრინცს ბრძოლის დროს დემონი წყევლას დაადებს, რაც მას დემონურ ძალას მიანიჭებს, მაგრამ თანდათან სასიცოცხლო ენერგიასაც ართმევს. ამის შემდეგ ის მოგზაურობას დაიწყებს, რომ წყევლის მოშორების გზას მიაგნოს. სწორედ ამ დროს აღმოჩნდება პრინცი ადამიანებსა და ცხოველებს შორის გაჩაღებულ ომში და გაიცნობს გოგონას, რომელიც ცხოველების მხარეს იბრძვის.

                                                                                                                                         

Hotarubi no Mori e

"ტყეში მბჟუტავი ციცინათელები" - ერთ-ერთი რეიტინგული ანიმე ფილმია, რომელიც 2011 წელს გამოვიდა, მთლიანობაში საკმაოდ მიმზიდველი არტის მქონე ანიმე  სტუდია Brain's Base და ტაკაჰირო ომორის 44 წუთიანი ნამუშევარია და დრამის, რომანტიკის და შოჯოს ჟანრებს მოიცავს. ანიმე მანგაზეა დაფუძნებული და არის 6 წლის გოგონა სახელად ჰოტარუ ტაკეგავაზე, რომელიც ტყეში დაიკარგება და იპოვის ტყის სული, იდუმალებით მოცული ნიღბიანი ბიჭი სახელად გინი. გინი გააფრთხილებს, რომ თუ ჰოტარუ მას შეეხება ის გაქრება. ბიჭი დაეხმარება ჰოტარუს ტყიდან გაღწევაში  და საბოლოოდ ისინი დამეგობრდებიან, თუმცა წლიდან წლამდე მეგობრობა  თანდათან რომანტიკულ გრძნობებში გადაიზრდება.

                                                   
Koe no Katachi 

"ხმის ფორმა" - სტუდია Kyoto Animation ერთ-ერთი მაღალრეიტიგული ანიმე ფილმია, რომელიც 2 საათზე მეტ ხანს გრძელდება და 2016 წელს გამოვიდა. ანიმე დრამის, სკოლისა და შოუნენის ჟანრისაა,  შესაბამისად კონკრეტული ასაკის მაყურებელზეა გათვლილი  და ხაზს უსვამს კიდეც მათ ასაკში არსებულ გამოწვევებს.  "ხმს ფორმა" არის შოია იშიდაზე, რომელიც დაწყებით სკოლაში ცუდი ყოფაქცევის ბიჭი იყო და მეგობრებთან ერთად თავის მორცხვ, ყრუ თანაკლასელ გოგონას, შოკო ნიშიმიას 'აბულინგებდა'. როცა ნიშიმია გადავიდა, მისმა მეგობრებმა და მასწავლებლებმა მას ზურგი აქციეს. მოგვიანებით უმაღლეს სკოლაში მყოფი ის ნიშიმიას კვლავ შეხვდება და გადაწყვიტავს თავისი დანაშაული გამოისყიდოს. ანიმე ნამდვილად დასამახოვრებელია როგორც არტით ისევე სიუჟეტური ხაზითაც. მის ღირსებას მხოლოდ ვიზუალური მხარე ნამდვილად არ წარმოდგენს (როგორც ზოგ სხვა შემთხვევებშია).

                                                                       

                                          

Gankutsuou

"გრაფი მონტე კრისტო" - 24 ეპიზოდიანი სტუდია Gonzo ანიმეა, რომელიც 2004 წელს გამოვიდა და დრამის, ზებუნებრივის, სამეცნიერო ფანტასტიკისა და მისტიკის ჟანრებს მოიცავს. ანიმე შედარებით უფროსი ასაკის მაყურებელზეა გათვლილი. ანიმე ალექსანდრე დიუამას ამავე სახელწოდების რომანზეა დაფუძნებული, შესაბამისად სიუჟეტის ძირითადი ფაბულაც იგივეა. ანიმე საკმაოდ მაღალრეიტინგულია და ერთ-ერთი ყველაზე გამორჩეული, განსხვავებული და ორიგინალურია პირველ რიგში თავისი ვიზუალური მხარით.

                                                                              

Mononoke

"მონონოკე" - კიდევ ერთი ანიმე, რომელიც არა მხოლოდ თავისი ესთეტიკით არის  გამორჩეული...  ანიმე შექმნილია სტუდია Toei Animation მიერ.  2007 წლის საკმაოდ მაღალრეიტინგული ანიმე გაგრძელებას წარმოადგენს 2006 წლის ანიმე სერიალის - "აიაკაში- სამურაის საშინელებათა ზღაპრები" (Ayakashi: Samurai Horror Tales) და შედარებით უფროსი ასაკის მაყურებელზეა გათვლილი. მონონოკე  ფსიქოლოგიურის, მისტიკის, საშინელებათა, ზებუნებრივის, სეინენის, ისტორიულის ჟანრებს აერთიანებს და სულ რაღაც 12 ეპიზოდისგან შედგება.  მოვლენები უძველესი დროის იაპონიაში ვითარდება, მთავარი გმირი "ფარმაცევტი",  იდუმალებით მოცული მაგიის ოსტატია, რომელიც იაპონიაში მოგზაურობს და ეძებს ბოროტ სულებს, სახელად მონონოკეს -გასანადგურებლად. მაგრამ როცა ამ სულის ადგილსამყოფელს დაადგენს, ჯერ უნდა გაიგოს და შეისწავლოს მისი ფორმა, არსი და მიზეზი. ყოველივე ეს კი ღრმა ფსიქოლოგიურ ანალიზს მოითხოვს. მხოლოდ ამის შემდეგ შეუძლია "ფარმაცევტს" ეგზორციზმის მახვილით ამ სულთან შებრძოლება და მისი განადგურება. მთლიანობაში ანიმეს მთელი ის ვიზუალი (არტი) კარგად ჯდება იმ საერთო ატმოსფეროში, რაც ამ ანიმეს აქვს.

                                                                       


Nerawareta Gakuen 

"ზებუნებრივი სკოლის ომები" - 2012 წელს გამოსული სტუდია Sunrise ანიმე ფილმი სასკოლოს, რომანტიკის და სამეცნერო ფანტასტიკის ჟანრის თითქმის 2 საათიანი ფილმია, რომლის ვიზუალური მხარეც ნამდვილად მოწოდების სიმაღლეზეა. შესაბამისი ასაკის მაყურებლისთვის შექმნილ ანიმეს იმდენად რამდენადაც სიუჟეტი პრიმიტიული და ბანალური აქვს, პეიზაჟები და გრაფიკა შთამბეჭდავია, მაღალხარისხიანია და მაკოტო შინკაის ნამუშევრებსაც მოგვაგონებს.  ანიმე სიუჟეტი ტრიალებს მთავარი გმირის სეკი კენჯის გარშემო, რომელსაც უყვარს გოგონა სახელად კაჰორი ჰარუკავა. კენჯის ჰყავს ბავშობის მეგობარი ნაცუკი სუზურა, ვისთან ერთადაც სკოლაში დადის და ეჭვიანობს კაჰორიზე რომელსაც ახალი სიმპათიური თანაკლასელი რიოუჩი კიოგოკუ მოწონს. :(დანარჩენს ანიმედან შეიტყობთ:)
                                                                                                                                                                               
Mahoutsukai no Yome
"მაგის საცოლე" -  არის კიდევ ერთი უახლესი, 2017 წელს გამოსული ანიმე სერიალი, რომელიც კარგი სანახავია პირველ რიგში არტის ხარჯზე. (ასევე მუსიკალური გაფორმების). ფანტაზიის, მაგის და შოუნენის ჟანრის 24 ეპიზოდიანი ანიმე სტუდია Wit Studio ეკუთვნის და ჩვეულებისამებრ შესაბამისი კატეგორიის მაყურებელზეა გათვლილი ანიმეა (13 წელი).  იმდენად  ხარისხიანად და კარგად არის გაკეთებული ის ყველაფერი, რაც ანიმეში ვიზუალურ მხარეს ეხება, რომ  ჩამონათვალი მის გარეშე ვერ დარჩებოდა. ანიმე კი არის ობოლ უმაღლესი სკოლის სტუდენტ გოგონაზე, სახელად ჩის ჰოტორიზე, რომელიც გადაწყვიტავს საკუთარი თავი აუქციონზე გაყიდოს. მას ბრიტანეთიდან ჩამოსული მაღალი, ნიღბიანი კაცი, სახელად ელიას ეინსვორტი 5 მილიონ ფუნტად იყიდის. ამის შემდეგ იწყება ჩიტორის ცხოვრება იდუმალ კაცთან.
                                                   
Hoshi wo Ou Kodomo
"ვარსკვლავებს დადევნებული ბავშვები" - ერთ-ერთი შთამბეჭდავი არტის მქონე ანიმე ფილმია. სტუდია CoMix Wave Films-ის თითქმის ორ საათიანი  ფილმი მაკოტოს შინკაის კიდევ ერთი ნამუშევარია. იმდენად რამდენადაც შესაძლოა სიუჟეტურმა ხაზმა ბევრი არ დააკმაყოფილოს, ვიზუალური მხარე, როგორც შინკაის ნებისმიერი  ნამუშევარში, აქაც მოწოდების სიმაღლეზეა და ამ შემთხვევაში რაღაცით "სტუდია გიბლის" ანიმეებთანაც შეიძლება პარალელის გავლება. ჩვეულებისამებრ შესაბამისი ასაკის მაყურებლისთვის გათვლილი 2011 წლის  ანიმე, სათავგადასავლო, ფანტაზიისა და რომანტიკის ჟანრებს აერთიანებს და ამბავი ახალგაზრდა გოგონაზეა, სახელად ასუნაზე, რომელსაც მხეცი დაესხმება თავს. სწორედ ამ დროს გამოჩენილი უცნობი ბიჭი კი მას სიკვდილისგან იხსნის. ამის შემდეგ კი მოვლენები ისე განვითარდება, რომ ასუნას მოუწევს სიკვდილის ქალაქ აგარტაში გამგზავრება.
                                                    
скачать dle 11.3
ტეგები:Konan Wiki Anime
საიტის კომენტარები
Konan
  • Konan
  • 7 აგვისტო 2018 19:45
Цитата: Migi

შეგიძლია მითხრა ვიკი როგორ გავაკეთო ?


მოკლედ და კონკრეტულად კი იქნება:
დაუკავშირდეთ მთავარ ადმინისტრატორს Yagami-ს ან მეორე ადმინისტრატორს Hyperion-ს. (ისინი დაგაკვალიანებენ რა და როგორ)
Lotus flower
საინტერესოა blush ვიცი რომ რამოდენიმე გახმოვანებული გაქვთ ამ ჩამონათვალიდან და კარგი იქნება დანარჩენებსაც თუ გაახმოვანებთ smirk დიდიხანია ლამაზი არტის მქონე ანიმე არმინახავს
Migi
  • Migi
  • 6 აგვისტო 2018 00:37
Цитата: Konan
აქ ჩამოთვლილ ანიმეებზე თქვენი აზრი სურვილისამებრ შეგიძლიათ კომენტარებში გაგვიზიაროთ, ასევე ის ანიმეებიც, რომელზეც თვლით, რომ შთამბეჭდავი არტი აქვს. <3

შეგიძლია მითხრა ვიკი როგორ გავაკეთო ?
Konan
  • Konan
  • 5 აგვისტო 2018 22:52
აქ ჩამოთვლილ ანიმეებზე თქვენი აზრი სურვილისამებრ შეგიძლიათ კომენტარებში გაგვიზიაროთ, ასევე ის ანიმეებიც, რომელზეც თვლით, რომ შთამბეჭდავი არტი აქვს. <3
კომენტარის დამატება
Информация
Посетители, находящиеся в группе სტუმარი, не могут оставлять комментарии к данной публикации.